Viandar cun nus ill’istorgia
La „SOCIETÀ STELVIO-UMBRAIL 14/18“ as sfadiescha per salvar e documentar ils stizis e las restanzas da la prüma guerra mundiala chi’s chatta amo illa regiun dals plü ots pass da muntogna da las Alps e da render tuot accessibel al public.
Illa cruschada da la regiun trilinga Val Müstair (Svizra) – Vnuost (fin dal 1918 Austria-Ungaria) – Vuclina (Italia) as rechattan ils relicts impreschiunants da quistas dispittas militaras rigurusas chi nu s’han fermadas neir davant la dürezza da l’ota muntogna.
La Confederaziun svizra ha gnü la furtüna d’esser statta schaniada da quist grond conflict militar mundial. Millis da sudats svizzers han prestà dürant ils ons 1914 – 1918 lur servezzan da defaisa naziunala in quista regiun da cunfin dals trais pajais. Els sun stats perdüttas da la dispitta sül plü ot chomp da battaglia da l’istorgia mundiala. Las perdüttas ocularas sun mortas. Restadas sun be lur notizias e singuls relaschs.
Gnit cun nus da stà süls stizis lung la rait da nossas sendas da viandar
o visitai nos museum a Sta. Maria.